Subit dopo Ornella nus fasè viodi doi libris. Cun lôr in man mi domandà se la siore Fey e Roberto a savevin che o jerin ca. I rispuint di no, che ur vevi scrit une letare, ma che no vevi vût rispueste.


Si slontanà e tornà dongje cuntun telefon e mi diis: clamâju cumò par che sepin che o sês ca. Jo no capìvi il parcè di tante premure, ma par no semeà malcreançôs o ai marcât il numar che jê stesse mi detave, nol à rispuindût nissun, e jere sabìde sul scurî e o vin lassat piardi l’argoment.
I doi libris che mi veve mostrats prin a jerin, “Finestre e finestrelle su Brazzà e altrove”, di Detalmo Pirzio-Biroli, chel altri al jere “I figli strappati” di Fey von Hassell.
Tal prin libri al à un cjapitul intîr dedicât a Nonino e Pine, cun abondant materiâl fotografic. Tal secont, il non dai mei bisnonos si ripetin di continuo. La sorprese e je stade tante che si nus son dreçâts i cjavei (come che si diis), tant a e mê femine come a me.


A chest pont sin lâts a cognossi l’intôr, si è fate gnot e o vin cenât tal ristorant de “La Roncolina” dongje il fogolâr cul so cjavedâl, e je stade une des cenis plui abondantis di dut il viaç, tant che no vin podût rivà a provâ il dolç. La idee e jere di jevà adore tal doman, là a Udin e dopo cirî di lâ a cognossi il Cjiscjel..

Domenie a vot e mieze o stevin fasint gulizion. La amabilitât dai parons di cjase e jere tante che nus vevin riservat il dolç che no vevin podût mangjâlu la sere prin, une vore bon.
Ma la sorprese de matine e je stade une altre. Luciano al vegnì cul so telefon, al marchà lui stes il numar de siore Fey Pirzio-Biroli. Come che jo no vevi paronance de lenghe Taliane, la siore Fey mi passà cun Roberto, e i ai contât de letare che jo vevi mandât. Mi diis che lu veve emozionat une vore, e che nol à podût rispuindimi par un viaç che a veve fât. Mi domandà cuant che o saresin lâts a Brazzà, e cuant che i ai dit che za si cjatavin li, mi diis: alore vignit al moment!.
Cussì al è stât che a diis di buinore di une domenie, o jerin jentrâts dulà che i miei antenâts a jerin lâts fûr sessante agn indaûr.
O sin rivats a visità il Cjiscjel e cognossi Roberto e Fey Pirzio-Biroli..

lâ indenant->
<- tornâ a "O sin rivâts"